वादको बखान

वादको बखान गरेर
निर्विवादको परिकल्पनामा
नयाँ विवादको चुली कसिन्छ
खेतका आली र घरका बर्दालीहरुबाट
मृत्‍युको शंखनाद गरेर
विजयोत्सव मानिन्छ !

अपवाद महरु
आवाद हुनुको श्वेत आकांक्षामा
चाँदनीको शीतलता र
सूर्यको उज्यालोको आगमन
घडीका सुईसँगै
टीक-टीक गनिबस्छौं
तर त्यो पेन्डुलमहरुसँगै
बन्दी बनिन्छ !

एकहूल हामीहरु
पेन्डुलमहरुका खातिर
ज्यानको बाजी लाएर
जिन्दावाद र मुर्दावादको
नादहरु उराल्छौ र
रगत पिपासु, कथित मुक्तिदाता
नूतन स्वादको मजामा
लिप्त भैदिन्छ !

जम्छ आसनमा खाओवाद
र हाम्रा उज्यालाका
कलिला स्वप्निल मुनाहरु
हतकडी लाएर जाक्छ
अँध्यारो गुफातिर
त्यसै कुहाइदिन्छ वा
यमहरुलाई खुवाइदिन्छ !


जागरण भया !
मौलाएको भ्रमवाद र विचलनवादको
भयवाद रसायन
ब्रह्मवादको खोजीले
निर्मलिकरण गर्दै
मानवतावाद झुल्किन्छ कि !

गजल

अलि तिमी हार, हारेँ अलि म, जीत होला हाम्रो !
स्वर्ग हुन नसके नि यो धरामा, हित होला हाम्रो !!

धेरै गायौं पीडामाथि, धुनभरि नाच्यौं रटमा,
त्यागि निन्दा गरे काम,सुखको गीत होला हाम्रो !!

तान्ने खुट्टा,लडाउने, खेल बन्दको बेला भयो,
हित्त-चित्त मिलाइ हिंडे पो, उचित होला हाम्रो !!

सद्भाव र शान्ति बोकी, मेची-काली कलकलाए,
दंग-चितपारी बैरी लोभ्याउने रीत होला हाम्रो !!

वीर्यदान गर्न सक्दिन म

बिहानी मनोरम छटाको भूमिमा
पहेंलिदै गरेका रवि किरणहरु
पहेंलो समुद्रमा डुबुल्की मार्दा
उत्तरबाट ध्वंसको ध्वाँस र रगतको गन्ध बोकेर
क्षेप्यास्त्र गोता लगाउँछ
त्यहीं कतै युद्धभेदी लडाकु जहाजहरु
शान्तिका प्रवर्तकहरुको इशारामा
प्रतिरक्षाको अभ्यास गर्दैछन्
अबुझ म
चिसिएको शसंकित मन लिएर
सन्नाटा बाँच्छु
आँखीभौँ सल्बलाउँछन् !

हिमाली मनोरम छटाको भूमिमा
बिहानी भालेको डाक नहुँदैं
दूलो पसेका भ्यागुताहरु
ट्वार-ट्वार गर्दै कोकोहोलो गर्छन्
वर्षाको संकेत
खडेरीको मौसममा मेघको महत्व, कठै !

लाचार भएका कोदालाहरु
आकाश नियाल्छन्
जात-प्रजातका भ्यागुताहरुको जोहो गर्छन्

चलेको चलन
ईन्द्र खुशी पार्न, धुमधाम
बिहे गरिन्छ भ्यागुताको
चारै दिशाका पण्डितहरुको मन्त्रोच्चारणमा
खोइ, थोपा खस्दैन आकाशबाट
शीतलताले छुँदैन कतै !
मनमा, तनमा पसिना खल्खली
उफ !


मुस्काउँदै गरेको त्यो बालक
वनकुसुम !
मेरी प्रिय अर्धागिंनीको अंगालोमा खेलाउने रहर
त्यो अधैर्यता
माफ गर प्रिय !यसपाली पनि
वीर्यदान गर्न सक्दिन म
मेरो मनभरि,
आशंका,भ्रम,भय,आक्रोश र जलनको आगो छ
जुन मेरा सन्तानले बोक्न नपरोस
विज्ञान भन्छ, वंषानुगत गुण ।

जहाँ जे भए नि
आऊ, यो साँझ सब बिर्सेंर
समागम गरौं
अलिकति मनको नैरास्यता भगाऔं
प्राकृतिक-अप्राकृतिक
गर्भनिरोधको उपाय कायम राखौं ।